ПРИ РАЗНЫХ НЕМОЩАХ И БОЛЕЗНЯХ

Пресвятой Владычице нашей Богородице и
Приснодеве Марии
ради честныя Ея иконы, именуемой
«СКОРОПОСЛУШНИЦА» (9 Н.)
Молитва

К Богородице притецем сущии в бедах, и ко святей иконе Ея ныне припадем, с верою зовуще из глубины души: скоро услыши наша моления, Дево, яко Скоропослушница нарекшася. Тебе бо раби Твои в нуждах готовую Помощницу имамы.
Святителю СПИРИДОНУ чудотворцу,
епископу Тримифунтскому (12 Д.)
Молитва

О великий и пречудный святителю Христов и чудотворче Спиридоне, Керкирская похвало, всея вселенныя светильниче пресветлый, теплый к Богу молитвенниче и всем к тебе прибегающим и с верою молящимся скоропредстательный заступниче! Ты веру православную на Никейстем Соборе посреде отцев преславно изъяснил еси, ты единство Святыя Троицы чудесною силою показал еси и еретиков до конца посрамил еси. Услыши нас, грешных, святителю Христов, молящихся тебе, и сильным твоим предстательством у Господа, избави нас от всякаго злаго обстояния: от глада, потопа, огня и смертоносныя язвы. Ты бо во временней жизни своей от всех сих бедствий избавлял еси людей твоих: от нашествия агарян и от глада страну твою сохранил еси, царя от неисцельнаго недуга избавил и многия грешники к покаянию привел еси, мертвых преславно воскрешал еси, за святость же жития твоего Ангелы невидимо в церкви поющия и сослужащия тебе имел еси. Сице убо прослави тебе, вернаго Своего раба, Владыко Христос, яко вся тайная человеческая деяния дарова тебе разумети и обличати неправедно живущия. Многим в скудости и Недостаточестве живущим ты усердно помогал еси люди убогия изобильно во время глада напитал еси и ина многа знамения силою в тебе живущаго Духа Божия сотворил еси. Сице и нас не остави, святителю Христов, поминай нас, чад своих, у Престола Вседержителя, и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя, и блаженства вечнаго в будущем веце сподобит нас, да выну возсылаем славу и благодарение Отцу и Сыну и Святому Духу, ныне и присно и во веки веков. Аминь.
Преподобному ПИМЕНУ Многоболезненному
Тропарь, глас 5

Богоноснаго Антония смиренномудрием подражая, терпением Иову подобяся, не исцеления от болезни, но паче протяжения тоя желал еси себе, терпеливодушне Пимене, да не како, здрав быв и от места сего родительми исторжен, сожития преподобных и чина их лишися, тем паче надежды от самих Ангел пострижен был еси, с нимиже моли Христа Бога спастися душам нашим.
Кондак, глас 6

Долговременную болезнь благодарив претерпевшаго, приидите, сошедшеся, восхвалим Пимена многотерпеливаго, иже бо иногда за смрад болезни бе гнушаем, сей ныне благоухание испущает с верою к раце мощей его приходящим и прогонит злосмрадие страстей от вопиющих: прииди, Пимене, к нам, и ничтоже успеет враг на ны.
Великомученику и целителю
ПАНТЕЛЕЙМОНУ (27 Ил.)
Молитва

О, великий угодниче Христов, страстотерпче и врачу многомилостивый Пантелеймоне! Умилосердися надо мною, грешным рабом, услыши стенание и вопль мой, умилистиви Небеснаго Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением Не возгнушайся греховных язв моих, помажи их елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся воприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь.
Священномученику ЕРМОЛАЮ (26 Ил.)
Тропарь, глас 1

Миром благодати помазан, преблаженне отче Ермолае, иерей Бога Вышняго явился еси и благочестия светлый проповедник, мученик же твердый и безмездный врач притекающих к тебе. Слава Давшему тебе крепость, слава Венчавшему тя, слава Дающему тобою всем исцеления.
Кондак, глас 4

Яко святитель благочестно пожив и священномучения венец приял еси. Идольския жертвы погасив, добрый Пастырь Христова стада был еси, премудре, и Пантелеимону истинный учитель. Сего ради почитаем тя песньми, вопиюще: от бед избави нас присно молитвами твоими, Ермолае, отче наш.
Стихира, глас 6

Веселися, граде Никомидие, радуйся, соборе верных, светло торжествующе в памяти Ермолая священномученика, скорбящих сострадательнаго утешителя, обидимых теплаго заступника, болящих безмезднаго врача, молящегося о спасении душ наших.
Преподобному САМПСОНУ
странноприимцу (27 Ин.)
Молитва

О теплый молитвенниче, благостный отче, преподобне Сэмпсоне! Моли Бога о мне, грешнем, и низпосли от Всеблагаго Владыки помощь ми и избавление, привременна бо есть жизнь моя и исполнена труда, скорбей и болезней. Укрепи сердце мое, да возмогу понести тяготу мою, и не попусти, да превозмогут искушения многая моя малыя силы, но предвари стези мои заступлением твоим, и посреде обстояний и бед управи путь мой в Царство Небесное, да славлю прославльшагося в тебе Господа во веки. Аминь.
Мученику ДИОМИДУ, врачу (17 Ав.)
Тропарь, глас 3

Мучительнии сосуди устроиша ти путь к Небесем, Христов воине Диомиде, победив диавольския козни, и на Небесех у Христа прославися, милися за творящих верою память твою.
Кондак глас 2.

Истинный и непобедимый страстотерпец, благочестия и благодати Небесный таинник явлься, Диомиде преславне, победив мучителя и победоносец быв, венцы победными прославися.
Бессребреникам и чудотворцам
КОСЬМЕ И ДАМИАНУ, римским мученикам (1 Ил.)
Молитва

К вам, святии безсеребренницы и чудотворцы Космо и Дамиане, яко к скорым помощникам и теплым молитвенникам о спасении нашем мы, недостойнии, преклоньше колена, прибегаем и припадающе усердно вопием: не презрите моления нас, грешных, немощных, во многие беззакония впадших и по вся дни и часы согрешающих. Умолите Господа, да пробавит нам, недостойным рабом Своим великия и богатыя Своя милости; избавите нас от всякия скорби и болезни, вы ибо прияли есте от Господа и Спаса нашего Иисуса Христа неоскудную благодать исцелений ради твердыя веры, безмездного врачевания и мученическия кончины вашея, услышите нас, молящихся, и благоприятным ходатайством вашим испросите у Христа Бога вся благополезная, яже в животе нашем временнем, наипаче же ко спасению вечному служащая, да сподобимся молитвами вашими улучити кончину христианскую, безболезненну, непостыдну, мирну, и да избавимся от козней диавольских и вечныя муки: бесконечного же и блаженного Царствия Небесного наследницы будем. Ей, угодницы Божии, непрестайте молящеся за ны с верою к вам притекающая, аще ибо по множеству грехов наших несмы ибо достойни милосердия вашего, обаче вы вернии подражателие Человеколюбия Божия суще сотворите, да принесем плоды достойны покаяния и в вечный покой достигнем, хваляще и благословяще дивного во святых своих Господа и Бога и Спаса нашего Иисуса Христа и Пречистую Матерь Его, и ваше теплое заступление, всегда, ныне и присно и во веки веков. Аминь.
Бессребреникам и мученикам
КИРУ и ИОАННУ (31 Я., 28 Ин.)
Тропарь, глас 5

Святии славнии Кире и Иоанне, безсеребреницы, мученицы и чудотворцы, милосердием своим, яко стеною необоримою, нас оградите от всех бед и от врагов видимых и невидимых сохраните непрестанною вашею молитвою ко Господу.
Кондак, глас 3

От Божественныя благодати дар чудес приемши, святии, чудодействуйте непрестанно, вся наша страсти рукодейством секуще невидимым, Кире Богомудре со Иоанном славным: вы бо Божественнии врачеве есте.
Мученикам ФОТИЮ и АНИКИТЕ (12 Ав.)
Тропарь
(общий мученикам)
Кондак, глас 2.

Божественныя, вернии и храбрыя ублажим супруги Христовы славныя, и похвалим, яко твердыя проповедники благочестию и суща рачители, Фотия и Аникиту, и песньми и хвалами венчаем.
Мученику ФАЛАЛЕЮ (20 М.)
Тропарь (общий мученику)
Кондак, глас 3.

Мучеником сострадалец явлься и оружник, воин изрядный Царя славы был еси, искушеньми и мукою возвышение идолослужителей попрал еси, сего ради честную твою поем память, мудре Фалалее.
Мученику ТРИФОНУ (1 Ф.)
Молитва

О святый мучениче Христов Трифоне, скорый помощниче и всем к тебе прибегающим и молящимся пред святым твоим образом скоропослушный престателю! Услыши ныне и на всякий час моление нас, недостойных рабов твоих, почитающих святую память твою во всечестнем храме сем, и предстательствуй о нас пред Господем на всяком месте. Ты бо, угодниче Христов, в великих чудесех возсиявый, источая и цельбы притекающим к тебе с верою и сущия в скорбех человеки заступаяй, сам обещался еси прежде исхода твоего от жития сего тленнаго молитися за ны ко Господу и испросил еси у Него дар сей: аще кто в какой-либо нужде, печали и болезни душевней или телесней призывати начнет святое имя твое, той да избавлен будет от всякаго прилога злаго. И якоже ты иногда дщерь цареву, в Риме граде от диавола мучиму, исцелил еси, сице и нас от лютых его козней сохрани во вся дни живота нашего, наипаче же в день последняго нашего издыхания предстательствуй о нас. Буди нам тогда помощник и скорый прогонитель лукавых духов, и к Царствию Небесному предводитель. И идеже ты ныне предстоиши с лики святых у Престола Божия, моли Господа, да сподобит и нас причастники быти присносущнаго веселия и радости, да с тобою купно прославляем Отца и Сына и Святаго Духа во веки. Аминь.
Архангелу МИХАИЛУ (8 Н.)
Молитва

О святый Михаиле Архангеле, светлообразный и грозный Небеснаго Царя воеводо! Прежде Страшнаго Суда ослаби ми покаятися от грехов моих, от сети ловящих избавити душу мою и приведи ю к сотворшему ю Богу, седящему на херувимех, и молися о ней прилежно, да твоим ходатайством послет ю в место покойное.
О грозный воеводо небесных сил, предстателю у Престола Владыки Христа, хранителю твердый всем человеком и мудрый оружниче, крепкий воеводо Небеснаго Царя! Помилуй мя грешнаго, требующаго твоего заступления, сохрани мя от всех видимых и невидимых враг, паче же подкрепи от ужаса смертнаго и от смущения диавольского, и сподоби мя непостыдно предстати Создателю нашему в час страшнаго и праведнаго Суда Его.
О всесвятый великий Михаиле Архистратиже! Не презри мене грешнаго, молящегося тебе о помощи и заступлении твоем в веце сем и в будущем, но сподоби мя тамо купно с тобою славити Отца и Сына и Святаго Духа во веки веков. Аминь.